2019-мĕш çула ООН йышăнăвĕпе Пĕтĕм тĕнчери тĕп халăхсен чĕлхисен çулталăкĕ тата Раççейре Театр çулталăкĕ тесе палăртнă. Çак çулталăксене халалласа пуш уйăхĕн 28-мĕшĕнче Комсомольски 1-мĕш вăтам шкулĕнче „Юптару тĕнчи” инсценировкăсен район шайĕнчи фестивалĕ иртрĕ.

   Фестивале хамăрăн тăван чĕлхемĕре упрас, ăна малалла аталантарас, илемлĕ литературăпа тата театрпа кăсăкланакан пултаруллă ачасене тупса палăртас, вĕсен сцена çинчи сăнар калăплас ăсталăхне аталантарас тĕллевпе ирттерме палăртнă.

   Район тапхăрĕнчи конкурса вун виçĕ шкултан килсе çитнĕ чи пултаруллă  вăтăр икĕ вĕренекен хутшăнма кăмăл турĕ. Жюри членĕсене  çĕнтерÿçĕсене тупса палăртма çăмăлах пулмарĕ.Кĕçĕн Çĕрпÿел шкулĕн вĕренекенĕ Ильина Снежана (ертÿçи-В.С.Ефимова) тата  Хирти Явăш шкулĕн вĕренекенĕсем Алексеева Снежана, Потапова Ксения тата Николаев Дмитрий (ертÿçи-Л.И.Никифорова) çĕнтерÿçĕ ята илме тивĕçлĕ пулчĕç. Владислав Николаев çырнă „Хăмпă артист” юптарăва каласа Снежана çынсен хушшинчи кĕвĕçÿ туйăмĕ пирки çăпатапа хăмпă сăнарĕсем урлă артист пекех кăтартса пачĕ. Хирти Явăш шкулĕн  ачисем Иван Крыловăн „Хресченпе тилĕ” юптарăвĕнче чыспа тата тÿрĕ кăмăлпа пурăнакан йывăрлăхра та, хĕн-хур тÿссен те вăрă-хурах çулĕ çине нихăçан та тăмĕ текен шухăша çирĕплетрĕç.Асанкасси, Тимĕрчкасси, Хырай Ĕнел, Нĕркеç тата Тăманлă Выçли шкулĕсен вĕренекенĕсем призер ята тивĕçрĕç.Асанкасси вĕренекенĕсем Суюкова Ксения, Иванова Ирина тата Маштанова Анна (З.Н.Максимова) Александр Кăлкан хайланă „Йытăпа кушак” юптарăвĕнче хăшĕ-пĕрисем йывăрлăх иртсен ырă тунине манса кайни пирки ĕненмелле кăтартса пачĕç.Тимĕрчкасси шкулĕн ачисем Крылова Анастасия тата Трофимова Анастасия (ертÿçи-Н.В.Филиппова) Николай Евдокимов хайланă „Ашакпа вăкăр” юптарура тепĕр чухне хăйсем нимех те чухламаççĕ, анчах та ăс пама ăста пулнине  кăмăла каймалла калăпларĕç.Нĕркеç шкулĕн вĕренекенĕсем Краснов Даниилпа Голыева Дарья (ертÿçи-Н.К.Ефремова) Трофим Иванов-Таçук çырнă „Пăта”  хайлавĕнчи пек хыт кукар пулмалла марри çинчен  питĕ ăста выляса кăтартрĕç.Хырай Ĕнел шкулĕн вĕренекенĕсем Лебедева Софья, Мартынов Владимир, Сорокина Александра, Сорокина Ульяна тата Мухина Анжела (ертÿçи-Л.Н.Владимирова) Александр Галкинăн „Канлĕ вырăн” юптарăвĕнче чиншăн, вырăншăн çунакансене питлерĕç.Тăманлă Выçли шкулĕн вĕренекенĕ Краснова Дарья (ертÿçи-Т.А.Шингалова) Александр Кăлканăн „Автансем” юптарăвĕнче ним пуршăн-çукшăнах тÿрех чăркăшмалла марри çинчен питĕ пултаруллă  каласа  пачĕ.

  Жюри членĕсем çĕнтерÿçĕсене пурне те грамота парса чысларĕç.Вĕсен ертÿçисене тав сăмахĕ каларĕç. Малашне те ăнăçу сунчĕç. Районта малти вырăна тухнă ачасем хăйсен пултарулăхне фестивалĕн республика тапхăрĕнче кăтартĕç.

      „Ачасен сцена çинчи пултарулăхне курса киленнĕ хыççăн чун-чĕре иксĕлми вăй-хăватпа тата лайăх кăмăл-туйăмпа пуянланчĕ.Малашне те çакăн пек фестивальсем пулсах тăччăр, вĕренекенсен вара  хăйсен пултарулăхне кăтартма майсем тупăнсах тăччăр. Тен, шăпах çак ачасем, юптарусене палăртуллă та илемлĕ вулаканскерсем, сценкăсенче ăста выляканскерсем, пурăна киле чаплă артист пулса тăрĕç.Пурне те тепĕр хут ăнăçу сунатпăр!”-пĕтĕмлетрĕç жюри членĕсем